Fränggisch

Der dragische Dod der heilichn Hildegund aus Höchstadt

Hinder dem godischn Chor der Pfarrkerng St. Georch in Höchstadt stehd seid 1997 die Stadue der Lokalheilichn Hildegund.

Der Legende nach lebde sie im 12. Jahrhunnerd und mit ihrm Erbe wurde das Kloser Münchaurach gschdifd. Mönche dieses Klosders ham im 14. Jahrhunnerd ihre Leemsgschichd aufgschriem:

Demzufolch wor Hildegund Waise und der Höchstadter Graf Goswin und sei Fraa ham sie zu sich gnumma nach Höchstadt und sie großzogn. Als die junga Fraa rangwachsen wor, had Graf Goswin, wies damals üblich wor, an standesgmäßn Ehemoo für sie gsuchd. Ned wissnd und ned ahnend, dass die junga Fraa beim Dood ihrer Eldern Jungfräulichkeid globd hod. Nun ham die Kinner damals noned widersprochn und Hildegund fügd sich in ihr Schiggsal. Bei aaner Kabelln an der Aurach soll die Hochzeid staddfindn. Hildegund bedridd die Kabelln, sprichd midm Briesder gheime Worde, und kehrd dann zurügg zum Hochzeidsmahl. Alle Gäsde san fröhlich, nur Hildegund ned. Ihr ist des Herz schwer, denn sie will ned heiern. Der junge Bräudigam drängd zum Aufbruch. Hildegund bidded, in der Kabelln noch amol Segn zur Reise erflehn zu dörfn. Und daliegend auf ihre Gnie bedd se lang, als ihr Geisd endfloh. Die Hochzeidsgsellschafd vermissd se, man kummd in die Kerng, sichd se daliegn, dengd ersd, sie schläfd, merkd ersd späder: sie lebd nimmer. Die Beschdürzung is guuß. Der Bräudigam, der die leemde Hildegund ned ham konnd, will edz die dode Hildegund midnehma, aber ihr Leichnam lässd sich – oh Wunner! – ned vom Flegg bewechn. Und so beschließd man, sie an Ord und Stell beizusedzn. Graf Goswin, dief erschüdderd, gelobd mit Hildegunds Erbe a Glosder zu stifdn. Aber wie des so is im Leem vo am Grafn, er hod ja nuch was anners zu doo und er vergissds. Da muss Hildegund ausm Jenseids nachhelfa. Sie erscheind dem Schlosskablan Alberd im Schlof und sachd nam „Einner‘ Goswin dro, dasser mid meim Erbe a Glosder stiftd“. Der Schlosskablan dengd sich: „Graf Goswin had grad was anners zu doo, ich sach lieber nix“. A zweids Mal muss Hildegund in Erscheinung dredn. „Erinner‘ Goswin“ – und diesmal berührd sie den Schlosskablan an der Baggn, so dass a Abdrugg blebbd und diesmal sprichd der Schlosskablan mit Graf Goswin. Aber der will ned hörn; er hat ja anners zu doo. Ersd, als Goswins Stiefsohn Heinrich bei am Erdrudsch in Idalien ums Leem kummd, besinnd sich Graf Goswin, nimmd Hildegunds Erbe und stiftd des Glosder Münchaurach. Er selber is in des Glosder eidredn und sei Fraa is mid nach Münchaurach zogn und had sich neberm Glosder a Haus baud.

Quelle: Nikolaus Haas: Geschichte des Slavenlandes. Erster Teil, 1819 -ins Fränkische übertragen (eigene Übertragung)